香港新浪網 MySinaBlog
Sun | 9th Feb 2008, 00:40 AM | 工作 | (157 Reads)
大年初二,一年一度的賀歲煙花,本來要去做,因為一單突發,留左在公司睇電視直播煙花,哎呀,舊年初二,send個sms畀人,話希望今年有機會同佢一齊睇,點知唔記得拎假,sorry囉。唔緊要啦,以後每年都仲可以一齊睇嘛,大把日子。

返埋今日,暫時結束在香港的工作,放兩日假,又開始三個月駐北京生涯,最最最遺憾,係下星期四不在香港...唉。

Sun | 6th Feb 2008, 13:32 PM | 工作 | (133 Reads)
年三十晚返夜記者,意料之內,都係在維園年宵市場,無咩驚喜。年初一放假,要同圍去拜年,最討厭係年初二仲要返夜,淨得番幾日在香港,其實好想抖下,早知拎假,後悔太遲。

祝願要在內地過年的同事行家們,新年快樂,早日返香港。

Sun | 4th Feb 2008, 20:30 PM | 生活 | (139 Reads)
上星期五晚,即係年廿五,同C小姐率先行維園花市,記得舊年,同一地點,又係一齊行花市,同行仲有幾個友好,一年後今日,變成兩個人拖住手行。

希望以後每個農曆年,都可以一路拖住C小姐行花市,行其他地方。

Sun | 25th Jan 2008, 23:54 PM | 工作 | (155 Reads)
今朝做港區人大選舉,曾特首用佢非常普通的普通話講解選舉規則,派選票畀各選舉會議成員,之後問,有無人拎唔到票?無反應,佢又問,又無人拎到多過一張選票?又係無反應。之後佢教大家要用專用筆,塗黑個格仔,要填夠三十六個,唔可以多唔可以少。一切,就好似當年考會考咁,但當望見台上的曾特首,同台下各式人士,覺得埸面好滑稽;而所謂總監票人梁先生,檢查個票箱,之後話,我檢查過個票箱喇,都係空既,而所有電子計票器,都係歸零,頂,好鬼白痴,又好做作囉。

 (閱讀全文)

Sun | 23rd Jan 2008, 23:58 PM | 工作 | (126 Reads)
返兩日sub,做四隻故仔,topic清一色都係「內地股市」!全部唔係出二條就係三條,全部都非常之咁趕,主要是自己的原因,因為財經超級唔在行,要花時間瞭解、吸收,至可以寫故仔,加上呢兩日公司「打風」,在凶險的環境下,戰戰兢兢,嚴重影響工作進度,哈哈,希望聽日唔駛繼續做財經,而且希望公司風暴快過,雨過天晴。

Sun | 20th Jan 2008, 18:22 PM | 閱讀 | (152 Reads)
同時睇緊兩本書,呢個係我的壞習慣,但就係貪心,本來睇開一本賈平凹的《高興》,十二月時在北京買的,點知突然發現九把刀出咗新書,《慢慢來、比較快》,呢排手頭比較鬆,都唔去搵簡體版,九十二蚊照買,要先睹為快嘛。

就好似明星趕兩組戲一樣,睇唔同的書都要調整心情,哈哈,要諗番故仔講到邊,之前出過咩人物等,好在一本係小說,另一本散文,比較易應付。

睇小說的另一個壞習慣,就係鍾意睇左個結局先,睇我今次忍唔忍得到。

Sun | 19th Jan 2008, 23:50 PM | 工幹 | (137 Reads)
最開心就係放假,仲要係一齊放假!行厭銅鑼灣,今日同C小姐去左荃灣,荃灣廣場裝修左,都唔認得路添,在戲院睇左套《末世凶煞》,ok啦,雖然略嫌無頭無腦,但氣氛都算緊張既。

悠閒的一日,拖手行下街,幾開心。

Sun | 15th Jan 2008, 09:12 AM | 工幹 | (157 Reads)
去了一轉台北加高雄,好遺憾,在高雄有行家出了意外,當時我沒有跟車隊,所以不在現場,約半小時後才趕到醫院。記得當天早上我和他才一起搭高鐵由台北南下,轉眼間發生意外,很不開心。

或者當事人是我認識的人,採訪之餘,亦多了一份憂心,對於台灣行家採訪的行徑非常討厭!或者平時我們採訪類似新聞,從來無考慮過傷者家人及朋友的感受。

祝早日康復。

Sun | 4th Jan 2008, 09:00 AM | 閱讀 | (166 Reads)
在北京期間,買到痞子蔡新書,叫《暖暖》。

今次小說男女主角終於衝出台灣,在北京邂逅,上演一段兩岸情緣,結局少少遺憾,涼涼同暖暖,始終唔可能會交疊?

又令我有翻看《檞寄生》的衝動。

Sun | 1st Jan 2008, 08:55 AM | 生活 | (116 Reads)
零六年十二月三十一日,同妳一齊過除夕,達成當時的心願。

今年除夕,更進一步,同妳二人世界一齊過,好幸福。

新一年的願望,出年會唔會成真呢。

新年快樂。

Sun | 30th Dec 2007, 22:33 PM | 工幹 | (178 Reads)
去左八日北京,第一次在北京過聖誕,落雪呀,係一個白色聖誕,可惜無摯愛的人陪我一齊分享。

 (閱讀全文)

Sun | 21st Dec 2007, 09:48 AM | 生活 | (155 Reads)
今年聖誕,要返通宵,唔緊要,諗住平安夜都可以早D去食大餐,一樣開心,最緊要有人陪我過,點知突如其來,要上京,唉,打亂哂計劃,好唔開心,最唔開心係,本來期待過一個暖笠笠、二人世界的平安夜,而家要在冷冰冰的北京一個人過,灰到爆 ...

寄望除夕一定要在香港至得 !

Sun | 13th Dec 2007, 23:16 PM | 生活 | (187 Reads)
今日上山頂,記得好似幾年都無去過,朝早十一點到纜車站,打蛇餅,突然發現原來買纜車飛加蠟像館飛唔駛排隊,真開心。細個搭纜車時,覺得好驚,因為好斜,成日驚會跌返轉頭,係就大鑊。

沿住山頂係咁而兜咗一個圈,行咗一粒鐘,遺憾今日空氣差,望落去睇唔到九龍。行完山就去睇蠟像館,都ok吖,閒日人少,可以慢慢影相。前年在北京都試過一條友睇蠟像,但已經無乜記憶。走之後,有人問,點解有劉德華、郭富城同黎明,好似唔見張學友?又真係好似唔多覺,定係我地睇漏咗呢?

 (閱讀全文)

Sun | 12th Dec 2007, 00:40 AM | 生活 | (467 Reads)
下晝在MCL JP睇《屍城30夜》,無想像中咁驚,不過幾血腥,成套戲配樂加埋氣氛都幾緊張,雖然劇情有犯駁的地方,但整體覺得ok,兩個鐘頭都算抵睇啦。

夜晚「一家人」在尚德食飯,咦!點解會有六個人嘅呢!? 呵呵呵!

Sun | 8th Dec 2007, 23:54 PM | 生活, 工作 | (189 Reads)
今日返sub,竟然,讀哂兩個新聞專輯,ok啦,可能間住一人讀一段,反而無平時讀簡報時咁多螺絲。我到而家為止讀過四次專輯,兩次午間兩次傍晚,分別拍住四個唔同的partner,可惜,未有機會同C小姐一齊讀,我好想架,雖然有人話我地把聲唔襯!

 (閱讀全文)

Next